หน้าแล้งปีนึงเมื่อตอนที่ผมเป็นเด็กเลี้ยงควาย
สมัยที่อยู่ ป.4 ปิดเทอมใหญ่ สิขึ้น ป.5 ข่อยจำได้ว่าไปนาเลี้ยงควายกับอิพ่อซุมื้อ ได้หยุดต้ะยามสงกรานต์ ต้ะปานนั้นยามมื้อแลงแห่ดอกไม้กะบ่ได้ไปแห่นำคะเจ้า เพราะอิแม่บอกออกไปลัดเอาควายนำอิพ่อ หย่างไปนำทางฟังเสียงลมพัดกอไผ่นาพ่อใหญ่คำมี กับนาบักกะต่าย เทิงเสียงกลองยุในบ้าน ทิดเมษาตีกลองยาวพาคะเจ้าแห่ดอกไม้ ย่านหลายแมนเสียงลมพัดกอไผ่แถวสวนยายเสาร์ผู้กองธานินทร์
มุข่อยกับเขาบักเหนกพากันแล่นประจำยามกายไป555
ต้นเดือนเมษาฝนตกใหม่ๆบางมื้อกะหาหักแหนงหน่อไม้เกิดใหม่ หม่องคะเจ้าเผากอไผ่ ที่มันแตกพุ่มขึ้นมา อยู่แถวนาพ่อใหญ่ทัน นาอ้ายทิดดง
ยามนี้บักม่วงไข่ต้นนาพ่อใหญ่คำมี ไผกายไปกะเลี้ยวเข้าไปเอาค้อนดึกเลวบักม่วง บางคนเอาหนังสติ้กยิงเอากะมี ปานว่ามันแซบหลายอิหลี บางทีข่อยกะสงสัยเป็นหยังคนสมัยก่อนคือบ่พากันซื้อพันธุ์บักม่วงไปปลูกไว้นาจะของ
(ถ้าใครมั่นใจว่าไทบ้านอิหลีจะต้องเคยผ่านและแวเข้าไปเอาค้อนเลวบักม่วงไข่ต้นนาอ้ายทิดเวศ ต้นนี้แน่นอน)
พ่อใหญ่เตียงยามไปนาเรามักเปิดฟังรายการวิทยุของนักจัดรายการข่อยมักฟังรายการขำขัน ของพ่อใหญ่ชัยกมล รุ่งเรืองเวช นอกนั้นกะมีรายการของสาวอีสานกับพ่อใหญ่ทองแปะ สีกานดา มื้อนึงเขาเว้าเรื่องการขยายพันธุ์ต้นไม้ เช่นบักม่วง บักนาว อิพ่อข่อยลงทุนไปซื้อม้วนเทปพลาสติกไส อยู่ร้านเหรียญชัยเอาไปนา ไปติดตา ทาบกิ่ง บักม่วงใหญ่ต้นอยู่สวนเถียงนา ตั้งหลายหง่า เทิงติดแนบ่ติดแนแต่กะยังดีที่ยังมีกิ่งติด(ถ้าไผบ่รู้จักร้านเหรียญชัยกับร้านคำหล้า แสดงว่าไปบ่ฮอดคิวรถ บขส.ขอนแก่น)
ยามแล้งปีนึงอิพ่อพาข่อยหลกตอเฟียงอยู่ไห่นา เอาไปแช่น้ำไว้ยุในสา 2-3 มื้อ พ่อสิพาเพาะเห็ดเฟียง อยู่บวกใกล้น้ำส่างห่มกกไฮ ผั่นนะ พาข่อยเสียหญ้า พรวนดินยกร่องขึ้นมา เป็นแปลงเห็ด ตอนปลูกเอาตอเฟียงมาวางเรียงเป็นชั้นๆเทิงฟักก้านกล้วยกับหัวมันสำปะหลังใส่ผสมกัน เห็ดมันจั่งสิเกิดดีผั่นนะ มีทิดคมกับทิดอ้อดเป็นผู้มานั่งซอมสังเกตการณ์ (มุเจ้าพากันเฮ็ดหยังลุงทิด ผั่นนะทิดคมถาม)แล้วนั่งเบิ่งวิธีการปลูกเห็ดเฟียงของพ่อใหญ่เตียงกับลูกซาย 555
เฟียงกองบักใหญ่ใส่เชื้อเห็ดถุงเดียว มื้อต่อๆมายามไปนากะเทียวจอบเทียวเปิดพลาสติกคลุมแปลงออกเบิ่ง ลุ้นว่าเห็ดเฟียงสิเกิดมาหลายปานได๋ คิดไว้ว่าถ้าเห็ดมันเกิดหลายอาจสิฝากให้แม่ใหญ่เอาไปขายตลาดเช้ากับยายอยู่กะได้ 555 (สมัยก่อนที่ยายบุ่นกับยายอยู่พากันหาของไปขายตลาดเช้าในเมือง)
หลายมื้อผ่านไปเปิดมามื้อได๋กะเห็นต้ะไรเห็ดสีขาวๆเฟียงกะเริ่มเน่าแต่เห็ดบ่เป็นดอกจั้กเทียจักเป็นแนวได๋ เอาไปเอามาจนได้ตัดสินใจรื้อแปลงเห็ดถิ่มซือๆมันนานเกิดหลาย แต่กะภูมิใจเพราะสุดท้ายกะยังได้ปุ๋ยหมักเฟียงเน่ามากองนึง ผั่นนะ555
ปล.ใครไม่เคยลักบักงิ้วไปแลกยางอาจจะอ่านไม่รู้เรื่องก็ได้555
#เคยมีใครสงสัยเหมือนผมมั้ยครับ ทำใมเราจึงเรียกต้นลำมันสำปะหลังที่ตัดจะเอาไปปลูกว่า “ดูกมัน”?
คำศัพท์....
ห่มไฮ-ร่มของต้นโพธิ์ไทร
หลกตอเฟียง-ถอนตอฟางข้าว
เห็ดเฟียง-เห็ดฟาง
มื้อ-วัน
เสียหญ้า-ดายหญ้า
ข่อย-(สรรพนาม)ใช้แทนตัวผม
โฆษณา
- ดาวน์โหลดแอปพลิเคชัน
- © 2025 Blockdit
