ລັດຖະບານ ອໍານວຍຄວາມສະດວກ
ດ້ານພາສີ-ອາກອນ ໃຫ້ບໍລິສັດ ນ້ຳມັນເຊຶ້ອໄຟ
ໃນວັນທີ 10 ທັນວາ 2021 ທີ່ກະຊວງການເງິນ, ທ່ານ ບຸນເຫລືອ ສິນໄຊວໍຣະວົງ ຮອງລັດຖະມົນຕີ ກະຊວງການເງິນ ໄດ້ມອບຂໍ້ຕົກລົງວ່າດ້ວຍການອະນຸມັດອຳນວຍຄວາມສະດວກດ້ານພາສີ ແລະ ອາກອນ ໃຫ້ແກ່ທ່ານ ຈັນທອນ ສິດທິໄຊ ປະທານບໍລິສັດ ປີໂຕເທຣດ ນໍາເຂົ້າ-ສົ່ງອອກ. ພ້ອມນີ້ ໄດ້ຮ່ວມລົງນາມໃນບົດບັນທຶກຄວາມເຂົ້າໃຈ ວ່າດ້ວຍການກະກຽມຄວາມພ້ອມ ແລະ ຈັດຕັ້ງປະຕິບັດນະ ໂຍບາຍອໍານວຍຄວາມສະດວກດ້ານພາສີ ແລະ ສ່ວຍສາອາກອນ ກັບທ່ານ ບຸນຍົກ ບຸດສະວົງ ຮອງອໍານວຍການໃຫຍ່ ລັດວິສາຫະກິດ ນໍ້າມັນເຊື້ອໄຟລາວ ແລະ ທ່ານ ນາງ ເລ ແທງ ຖຸຍ ຜູ້ອໍາ ນວຍການໃຫຍ່ບໍລິສັດ ເປໂຕຫວຽດນາມອອຍ ນໍາເຂົ້າ-ສົ່ງອອກ ຈຳກັດ ໂດຍມີພາກສ່ວນກ່ຽວຂ້ອງເຂົ້າຮ່ວມ.
ສໍາລັບການອະນຸມັດ ໃຫ້ບໍລິສັດ ປີໂຕເທຣດ ນຳເຂົ້າ-ສົ່ງອອກ ຈຳກັດ ທີ່ໄດ້ຮັບການອຳນວຍຄວາມສະດວກດ້ານພາສີ ແລະ ອາກອນ ເປັນການສືບຕໍ່ປະຕິບັດການກວດກາປະເມີນຜົນຕາມເນື້ອໃນບົດບັນທຶກຄວາມເຂົ້າໃຈ ໃນການກະກຽມຄວາມພ້ອມ ລະຫວ່າງກະຊວງການເງິນ ກັບ ບໍລິສັດ ປີໂຕເທຣດ ນຳເຂົ້າ-ສົ່ງອອກ ຈຳກັດ ໃນຄັ້ງວັນທີ 26 ຕຸລາ 2021 ແລະ ເປັນບໍລິສັດທໍາອິດ ທີ່ໄດ້ຮັບການອະນຸມັດຕາມແຈ້ງການ ສະບັບເລກທີ 4491/ກງ, ເປົ້າໝາຍເພື່ອສ້າງບໍລິສັດຕົວແທນ ໃນການດໍາເນີນທຸລະກິດນໍ້າມັນເຊື້ອໄຟ ແລະ ພາກລັດ ສາມາດເຊື່ອມຕໍ່ລະບົບຕິດຕາມຂໍ້ມູນ ການຂາຍຂໍ້ມູນສາງຂອງບໍລິສັດກັບລະ ບົບຄຸ້ມຄອງລາຍຮັບສ່ວຍສາອາກອນ ຂອງກະຊວງການເງິນ.
ສຳລັບການເຊັນບົດບັນທຶກຄວາມເຂົ້າໃຈ ຂອງລັດວິສາຫະກິດ ນໍ້າມັນເຊື້ອໄຟລາວ ແລະ ບໍລິສັດ ເປໂຕຫວຽດນາມອອຍ ນໍາເຂົ້າ-ສົ່ງອອກ ຈຳກັດ ເປັນການລິເລີ່ມກ່ຽວກັບການປະເມີນຄວາມພ້ອມກ່ອນການໄດ້ຮັບອະນຸມັດ ການອຳນວຍຄວາມສະດວກ ແລະ ຄະນະວິຊາການຂອງກະຊວງການເງິນ, ພ້ອມກັນນັ້ນ, ຄະນະວິຊາການຈາກກະຊວງການເງິນ ຈະລົງປະເມີນຄວາມພ້ອມຕົວຈິງແລ້ວລາຍງານໃຫ້ລັດຖະມົນຕີ ກະຊວງການເງິນພິຈາລະນາອະນຸມັດຕາມເງື່ອນໄຂ. ການອໍານວຍຄວາມສະດວກດ້ານພາສີ ແລະ ອາກອນ ແມ່ນເປັນປະຕິບັດຕາມແຈ້ງການຂອງກະຊວງການເງິນ ສະບັບເລກທີ 4491/ກງ, ລົງວັນທີ 14 ກັນຍາ 2021 ກ່ຽວກັບການຄຸ້ມຄອງນໍາເຂົ້ານໍ້າມັນເຊື້ອໄຟ, ຈຸດປະສົງແນໃສ່ສ້າງກົນໄກອຳນວຍຄວາມສະດວກ ໃນຂອດນຳເຂົ້ານໍ້າມັນເຊື້ອໄຟຈາກຕ່າງປະເທດເປັນຕົ້ນ: ການແຈ້ງເອກະສານນຳເຂົ້າລ່ວງໜ້າ ການຊໍາລະຄ່າພາສີ, ອາກອນຊົມໃຊ້ອາກອນມູນຄ່າເພີ່ມ 30 ວັນ ຫລັງຈາກມີການນຳເຂົ້າແລ້ວຈຶ່ງກັບໄປຊໍາລະຄືນ ຕາມລະບົບການແຈ້ງພາສີ ASYCUDA.
ທ່ານ ຈັນທອນ ສິດທິໄຊ ປະທານບໍລິສັດ ປີໂຕເທຣດ ນໍາເຂົ້າ-ສົ່ງອອກ ຈໍາກັດ ໄດ້ໃຫ້ສຳພາດວ່າ: ບໍລິສັດປີໂຕເທຣດ ຫລື ປໍ້ານ້ຳມັນພາສ, ຊຶ່ງໃນປັດຈຸບັນທົ່ວປະເທດ ມີ 135 ປໍ້າ, ຊຶ່ງເປັນອັນດັບ 2 ໃນອຸດສາຫາກຳຂອງນ້ຳມັນຂອງປະເທດ, ການໄດ້ຮັບຂໍ້ຕົກລົງວ່າດ້ວຍການອະນຸມັດອຳນວຍຄວາມສະ ດວກດ້ານພາສີ ແລະ ອາກອນ, ຊຶ່ງເປັນບໍລິສັດທຳອິດ ຫລື ເອີນວ່າ AEO ແມ່ນມາດຕະຖານບໍລິການຈັດການງານໄດ້ມາດຕະຖານສາກົນທີ່ບໍລີສັດປະກອບເຂົ້າພັນທະງົບປະມານຖືກຕ້ອງຕາມລະບຽບການ.ລັດ ຖະບານກໍຄື ກະຊວງການເງິນ ຈຶ່ງໄດ້ໃຫ້ໃບຮັບຮອງບໍລິສັດປີໂຕຣເທຣດ ເປັນມາດຖານ AEO ເປັນການອຳນວຍຄວາມສະດວກ, ສ້າງໃຫ້ຜູ້ປະກອບການດໍາເນີນທຸລະກິດເຮັດໃຫ້ຖືກຕ້ອງ, ມີກຳລັງໃຈປະ ກອບພັນທະເຂົ້າງົບປະມານແຫ່ງລັດ.
ທ່ານ ບຸນຍົກ ບຸດສະວົງ ຮອງອໍານວຍການໃຫຍ່ລັດວິສະຫາກິດ ນໍ້າມັນເຊື້ອໄຟລາວ ໃຫ້ສໍາພາດວ່າ: ການເຊັນບົດບັນທຶກຄວາມເຂົ້າໃຈ ວ່າດ້ວຍການກະກຽມຄວາມພ້ອມ ແລະ ຈັດຕັ້ງປະຕິບັດນະໂຍ ບາຍອໍານວຍຄວາມສະດວກດ້ານພາສີ ແລະ ສ່ວຍສາອາກອນ, ເປັນການສ້າງເງື່ອນໄຂໃນການເຂົ້າຮັບນະໂຍບາຍອໍານວຍຄວາມສະດວກດ້ານລະບອບພາສີ ແລະ ສ່ວຍສາອາກອນ, ຈະມີຜົນດີຫລາຍຢ່າງຕໍ່ການດໍາເນີນທຸລະກິດຂອງລັດວິສາຫະກິດນໍ້າມັນເຊື້ອໄຟລາວ ບໍ່ວ່າຈະເປັນການເສຍພັນທະພາສີ-ອາກອນພາຍຫລັງ 30 ວັນ, ຊຶ່ງຈະເຮັດໃຫ້ສະພາບຄ່ອງທາງດ້ານການເງິນຄ່ອງຕົວຍິ່ງຂຶ້ນ, ການອໍານວຍຄວາມສະດວກຕ່າງໆ ໃນເວລານໍາເຂົ້າສິນຄ້າ, ການເຄື່ອນຍ້າຍສິນຄ້າ ແລະ ເຮັດໃຫ້ມີຄວາມໂປງໃສໃນດ້ານການບໍລິຫານຈັດການດີຍິ່ງຂຶ້ນ. ນອກຈາກນີ້, ຍັງເປັນການສ້າງເງື່ອນໄຂເຂົ້າເປັນສະມາຊິກ AEO ຍິ່ງຈະໄດ້ຮັບການອໍານວຍຄວາມສະດວກຂຶ້ນໄປອີກ.
ສະນັ້ນ, ລັດວິສາຫະກິດ ນໍ້າມັນເຊື້ອໄຟລາວ ພ້ອມແລ້ວທີ່ຈະປະຕິບັດຕາມເງື່ອນໄຂຕ່າງໆ ຕາມແຈ້ງການສະບັບເລກທີ 4491/ກງ, ລົງວັນທີ 14 ກັນຍາ 2021 ແລະ ຄໍາແນະນໍາຂອງກະຊວງການເງິນ ສະບັບເລກທີ 1159/ກງ, ເພື່ອເຮັດແນວໃດໃຫ້ລັດວິສາຫະກິດໄດ້ເຂົ້າຮັບນະໂຍບາຍອໍານວຍຄວາມສະດວກດ້ານພາສີ ແລະ ສ່ວຍສາອາກອນ ແລະ ເຮັດໃຫ້ການດໍາເນີນທຸລະກິດຂອງລັດວິສາຫະກິດ ນໍ້າມັນເຊື້ອໄຟລາວ ມີຄວາມເຂັ້ມແຂງນໍາອີກດ້ວຍ.
ຂ່າວຈາກ: ຂປລ
โฆษณา
- ดาวน์โหลดแอปพลิเคชัน
- © 2024 Blockdit
