มื่อนี้มีเรื่องเล่า
ชีวิตในวัยเรียน (ประถม 1)
เด็กเลี้ยงควาย
ย้อนกลับช่วงเรียนประถมพี่น้อง ตอนยุอนุบาล-ป.3 ได้เงินไปโรงเรียนมื่อละ 1 บาทสมัยนั้นข้าวเกรียบกุ้ง 2 ห่อ/1บาท โอเด้งห่อละ 1 บาทเป็นขนมยอดนิยมสำหรับเด็กในช่วงนั้นเพราะทั้งแซบแล้วกะราคาแพง หมากฝรั่งนกแก้ว 1 บาทได้ 5 ก้อน😊หย่ำ (เคี้ยว)แล้วพากันเอาไปติดไว้นำเก้าอี้หมู่พี่น้องเอ้ย😂 ยามซังกันเอาติดฮอดผมมันพุ้นนะ เว้าถึงวีรกรรมความมึนของข่อยนี้บ่ธรรมดาเด้ดื้อคักปานเด็กผู้ชาย โดยวีรกรรมของข่อยประกอบด้วย
- 1.เอายางวงดีดเข้าใต้กระโปรงครู สมัยนั้นอาคารเรียนเป็นไม้ทั้งหลังเด็กน้อยเข้าแถวขึ้นห้องถ่าครูมาสอนกะสิพากันเล่นยางวงถ่าครู เล่นหมากเก็บแน่ เบ่นจ้ำจี้แน่แต่มื่อเกิดเหตุนั้นมุข่อยพากันเล่นยางวง พากันปาดไส้ยุอย่างเมามัน ครูกะย่างเข้ามาในห้องแล่วบาดนี้ใส่กระโปรงทรงเอมาความสั้นกะเลยเข่าขึ้นเทิ่งพุ้นแล่วพี่น้องยามครูนั่งเก้าอี้เนาะกระโปรงมันกะร่นขึ้นเป็นช่องยุหน้าตักนั่นข่อยเหลียวไปเห็นแล้วกะเหมบลงพื้นทันทีเล็งอย่างจังเอายางใส่นิ้วแล้วดีดปิ๊วไปเลยเข้ากระโปรงครูทันทีดังฟื๊ดครูกะฮึ๊เสียงหยังเหลียวหาบ่เห็น
กะเลยทักทายเด็กน้อยแล้วกะสอนต่อ ทางข่อยกับหมู่พากันนั่งหัวยุหลังห้อง ดีดแม่นคักพี่น้องเอ้ยไคตะบ่ถืกขาครูบ่งั้นมีถืกแส้ตั้วข่อย🤭🤭🤭
2. เอายางวงดีดดากครู ตอนยุป. 3 ครูประจำชั้นข่อยเป็นครูผู้ชายพี่น้องเลาผู้บักใหญ่อ้วนกะอ้วนชื่อว่าครูอ้วนยามเลานั่งลงนี้กางเกงเลากะรูดลงนำคิดออกบ่พี่น้องพอตะกางเกงมันรูดลงมันกะสิเห็นร่องก้นเพิ่นเนาะคิดเบิ่งตั้วว่ามันสิร่องใหญ่รึร่องน้อย😄ทางข่อยนี้เห็นบ่ได้จำเป็นต้องจัดได้ยางวงมาข่อยกะดีดทันทีเข้าง่ามดากครูปั๊บข่อยกะขอโตไปเข้าห้องน้ำปุ๊บแล่นหนีอย่างเร็วครูนี้บ่มีเวลาคิดหาโตการเลยละว่าไผดีดดาก 5555
3. ตีกันกับผู้ชาย อันนี้กะตอนอยู่ป.3คือกันพี่น้อง เหตุมันเกิดจากตอนนั้นข่อยเป็นหัวหน้าคุมเบิ่ดห้อง
ละพี่น้องบ่ว่าผู้หญิงผู้ชายกะต้องย่านต้องเกรงข่อยใด่คุมมาตั้งป.1มื่อเกิดเหตุนั้นข่อยมีปากเสียงกับหมู่ผู้หญิงคนนึงมันอยากแตกกอแตกเหล่าบ่ฟังความกะเลยสั่งสอนไปยกใหญ่ตีกันแล่วพี่น้องหยุมหัวหยุมแขนกันอุตลุดเลย😁สรุปว่าข่อยชนะไปจากเหตุการณ์นี้มีหมู่ผู้ชายคนนึงมันบ่พอใจข่อยพี่น้องมันหาว่าข่อยนี้ห่มเหงหมู่มันกะเลยมาเว้าให้กะเถียงกันยุเติบนึงพุ้นละเถียงไปเถียงมากะเลยตีกันตีกับผู้ชายบ่คือตีกับผู้หญิงแล่วบาดนี้พี่น้องข่อยเสียเปรียบมันหลายเติบเพราะข่อยเป็นคนผู้น้อยผู้จ่อยแต่มันผู้บักใหญ่ทั้งเป็นผู้ชายนำ
ยังบ่ทันรู้แพ้ชนะหมู่มันมาแยกออกก่อนข่อยกะเกือบไห้พุ้นแล่วพี่น้องเอ้ยน้ำตาโห่งหน่วย (น้ำตาคลอเบ้า)เหลี่ยนๆสายตาคาดโทษคู่กรณีบักคักนึงพอตะตีกันแล้วหลังจากนี้พวกผู้ชายในห้องทั้งหลายมันกะเริ่มเซาย่านข่อยเด้บาดนี้พากันแข็งข้อเบิ่ดย้อนว่าข่อยเกิดมาผู้น้อยเลยคุมผู้ชายบ่ได้😩
4. จับงูปลา จับแมงบ้ง (ตัวบุ้ง)ใส่หมู่สมัยนั้นอยู่ในโรงเรียนมีสระเด้พี่น้องกะบ่ลึกหลายดอกขอบๆสระกะมีกอไผ่เป็นหม่องยุของแมงบ้งแป่ม ยามไปเข้าห่องน้ำนี้ข่อยกะสิจับเอาแมงบ้งมานำเอามาวางไว้โต๊ะหมู่แน่โยนใส่ใส่เสียงร้องกรี๊ดกร๊าดบ่ต้อง
พูดถึงพี่น้องเอ้ยม่วนหลายข่อย ส่วนงูปลานี้สิมีช่วงน้ำขอดมันสิมาหากินปลาน้อยข่อยกะมาจับเอาไปใส่หมู่อีกคือเก่าละพี่น้อง
เอาพอหอมปากหอมคอก่อนเนาะมื่อนี้ถ้าให้เล่าอีหลีสามมื่อกะบ่จบดอก😁ขอโตไปเฮ็ดเวียกก่อนเด้อมื่อนี้🥰🥰🥰
โฆษณา
- ดาวน์โหลดแอปพลิเคชัน
- © 2024 Blockdit
