บันทึกของอิหล่าน้อย |ปลายดอย EP.7
“ฤดูบักม่วงสุก กับความทรงจำในรถตุ๊กตุ๊กคันแรกของบ้าน”
..โอ่ยน่อ…😄
ปีนั้นหล่าขึ้น ป.2 พุ้นเด้
ผลสอบออกคือเก่า… อันดับหนึ่งมาแต่ไสอีก
แต่ที่พิเศษกว่าปีก่อน กะคือทุนเรียนดีจาก ส.ส.ชัย
ชิดชอบ ที่ได้มาแบบบ่ได้คาดคิด
หล่าจำได้ดี วันนั้นถือใบประกาศใส่แฟ้มแข็งไว้แน่นๆ พอถึงบ้าน กะเอาไปแอบเก็บไว้ใต้หมอน
บอกบ่ได้เด้อ… ว่าภูมิใจปานใด๋
มื่อนั้น หน้าบักม่วงสุกพอดี พ่อเอิ้นหล่าแต่เช้า
“หล่าเอ้ย ไปเก็บบักม่วงนำพ่อแน เดี๋ยวแดดฮ้อนก่อน”
แล้วหล่ากะกระโดดขึ้นรถตุ๊กตุ๊กคันเดียวของบ้าน
ตอนนั้นในหมู่บ้านยังบ่มีไผมีเด้อ พ่อเพิ่งถอยมาจากในเมือง พ่อว่าเอาไว้ใช้ขนของสวน
หล่านั่งหน้า ยืดอกซ่ำข่อยเป็นเจ้าเมือง พ่อหัวเราะ แล้วบอกว่า
“ขับให้โตเป็นหล่าเด้อ โตสิได้มีรถขับเองบ้าง”
ที่สวน บักม่วงสุกเต็มต้น หล่ากะซอยพ่อเก็บ
บางลูกตกใส่หัว บ่เป็นหยัง หล่าหัวแข็ง
พอสุมใส่ตะกร้าเต็มๆ ก็ขนขึ้นหลังรถ
กลับถึงบ้าน แม่แบ่งบักม่วงใส่ถุงถืกๆ ขนาด แพ็คไว้ส่งคนที่เฮาฮัก
บักม่วงชุดหนึ่งส่งไปให้พ่อใหญ่หนิด
อีกชุดแบ่งให้พ่อใหญ่น้อย กับแม่ใหญ่เหวย
ส่วนที่เหลือแม่ว่า “เอาไปฝากปู่ย่าที่หนองฉิมแนหล่า”
แม่เพิ่นใจดีคือจังน้ำแกงฮ้อนๆ ยามฝนตก
แบ่งให้คนได้กะดีใจ บ่ได้หวังไผมาให้คืน
ที่เหลือจากฝากคนเฒ่าคนแก่
แม่ก็แพ็คอีกถุงไว้ส่งออเดอร์จองไว้ทางโทรศัพท์บ้าน
ตอนนั้นบ่มีไลน์ ไม่มีเพจ แต่ออร์เดอร์แน่นคือเปิดร้านบนดาวอังคาร
หล่าจำได้ว่าเป็นคนเขียนชื่อคนจองลงในกระดาษแผ่นยาวๆ
แม่ขาย หล่าซอย… เงินที่ได้มาหล่ากะยกให้แม่เบิด บ่เคยหวงไว้ซื้อของเล่นแม้แต่บาทเดียว
อ่านมาจนฮอดมื่อนี่
เอื้อยอ้ายหลายคนอาจสิเริ่มเข้าใจ
ว่าทำไมหล่าถึงชอบขายของออนไลน์
ทำไมใครๆ ถึงบอกว่าหล่าขายเก่ง
มันกะเพาะหล่าขายด้วยความฮัก
ความหลังที่ฝังแน่นอยู่ในรอยยิ้มของแม่ ในเสียงหัวเราะของพ่อ
มันเลยบ่ใช่แค่การขาย… แต่มันคือความทรงจำที่มีชีวิต
กลอนปิดบันทีกจากใจหล่า...ซอดฮอดใจอ้ายโลดเด้อ💔
บักม่วงสุกลูกโตงาม
เถิงยามห่ามก็เถิงใจ
พ่อแม่สอนให้เก็บไว้
แบ่งให้ใช้ บ่เอาไว้ผู้เดียว
ใจอิหล่าน้อยบ่ใหญ่หลาย
แต่แบ่งให้ได้ทุกมื้อเชียว
ย้อนโตเกิดบนแผ่นดินเปลี่ยว
แต่โตมาแบบมีคนเฮ็ดให้อุ่นใจ
ถ้าอ่านจบ EP7 นี้แล้ว เอื้อยอ้ายบ่ยิ้ม
หล่าคงต้องขออนุญาตปลูกต้นบักม่วงแถมไว้ในใจแนแล้วเด้อ
เจอกันอีกใน EP8 เด้อ… มื้อนี้หล่าสิขอนอนเวนก่อนแล้วล่ะ💤😁
ขอบคุณที่มาเบิ่ง มาอ่าน มาอยู่กับหล่าเด้อ
#บันทึกของอิหล่าน้อยปลายดอย
#ลูกอีสานผู้คึดฮอดบ้าน
#ใผ๋อยากอินต่อติดตามตอนหน้าโลด
.
.ปลายดาวอินฟินิตี้
โฆษณา
- ดาวน์โหลดแอปพลิเคชัน
- © 2025 Blockdit
